KALAK – Vinafélag Grænlands og Íslands
Lokahnykkur laugardagsins um sl helgi þegar Vestnorræna hátíðin “nýjar slóðir” var haldin í Reykjavík voru stórtónleikar í flugskýlinu við Reykjavíkurflugvöll.
Tónleikarnir hófust klukkan 18 og var lokið rúmlega 21. Fjöldi áhorfenda var í skýlinu og lét fara vel um sig á sófum og stólum sem var raðað upp í skýlinu og auk þess voru áhorfendum gefnir bolir sem gerðir höfðu verið í tilefni hátíðarhaldanna.
Fyrst á stokk steig hin færeyska Guðríð Hansdóttir með gítarinn sinn og flutti nokkur lög. Fyrr um daginn hafði hún troðið upp í gámi sem færeyingafélagið hafði til umráða í Hljómskálagarðinum við mikinn fögnuð.
Næstur á svið var færeyskur piltur sem spilaði raftónlist og gengur hann undir nafninu ORKA. Hann spilaði einnig nokkur lög sem sumum þótti full tilraunakennd en aðrir meðtóku með mikilli gleði. Misjafn er tónlistarsmekkur mannanna en hann var í góðum gír á sviðinu og lét vel í sér heyra.
Þar á eftir brá íslenska gleðisveitin Prins Póló sér á sviðið og tók nokkur hressandi lög. Þau í Prins Póló eru miklir stuðboltar en væntanlega var meirihluti gestanna erlendis frá og skildu textana illa sem og það sem látið var flakka milli laga. Svona í fyrstu allavega, þangað til liðsmenn reyndu sig í skandínavískunni.
Síðastir á svið voru piltarnir í grænlensku hljómsveitinni Nanooq sem er ein þekktasta hljómsveitin þaðan. Spiluðu þeir popprokk og var áhorfendaskarinn greinilega ánægður með frammistöðuna, ekki síst þeir fjölmörgu Grænlendingar sem voru á svæðinu. Nanooq hefur verið á ferðalagi um hin og þessi lönd og eru orðnir nokkuð þekktir.
Þetta var hið skemmtilegasta kvöld og gaman að fá innlit í vestnorræna tónlist.
Hér má sjá þrjá meðlimi Nanooq stilla sér upp í skýlinu áður en þeir stigu á svið og einnig þegar þeir eru komnir í ham!
Myndirnar tók Arnar Valgeirsson
