KALAK – Vinafélag Grænlands og Íslands
Vestnorrænir dagar verða haldnir í Reykjavík um næstu helgi. Boðið verður upp á fjölda atburða sem fara fram í gámum víðs vegar í miðborginni. Laugardaginn 8. september hefst hátíðin með því að kokkar frá Færeyjum, Grænlandi og Íslandi kynna þjóðlega rétti við höfnina, viðburður verður svo í Norræna húsinu auk þess sem grænlenskir listamenn verða með uppákomur í Hljómskálagarðinum. Í Ráðhúsi Reykjavíkur verður skákhátíð þar sem færeyskur skákmeistari og Paulus Napatoq, blindur tvítugur piltur frá Ittoqqortoormiit eða Scoresbysundi munu tefla við gesti og gangandi og boðið verður upp á fjöltefli en stórmeistarinn Stefán Kristjánsson mun þar tefla við fjölda manns.
Um kvöldið verður Vestnorrænt partý í flugskýli við Reykjavíkurflugvöll og fjörið heldur svo áfram á sunnudeginum.
Nánar verður fjallað um hátíðina á kalak.is á næstunni.
