KALAK — VINAFÉLAG ÍSLANDS OG GRÆNLANDS

KALAK, vinafélag Íslands og Grænlands, var stofnað í Norræna húsinu í Reykjavík miðvikudaginn 4. mars 1992 og fagnar því 25 ára afmæli um þessar mundir. Í fyrstu stjórn KALAK voru Guðmundur Hansen formaður, Magnús Magnússon, Elísabeth B. Nielsdóttir og Kolbrún Sæmundsdóttir. Stofnfélagar voru 43.

Markmið KALAK er að vinna að auknum samskiptum Íslands og Grænlands, einkum á sviði félags- og menningarmála. Félagið hefur gegnum tíðina haldið fjölmörg mynda- og fræðslukvöld, staðið fyrir Grænlenskum dögum og stutt við samfélagsleg verkefni á Grænlandi, sérstaklega í þágu ungs fólks.

Stærsta verkefni KALAK árlega er heimsókn 11 ára barna frá litlu þorpunum á austurströnd Grænlands. Hingað koma þau ásamt fylgdarliði kennara og dvelja á Íslandi í rúmlega 2 vikur. Börnin sækja skóla í Kópavogi, þar sem þau kynnast jafnöldrum, fara í sundtíma tvisvar á dag og gera ótal margt skemmtilegt meðan á dvölinni stendur. Meira um Sundkrakkaverkefnið hér.

KALAK hefur líka frá upphafi, árið 2003, tekið virkan þátt í skáklandnámi og verkefnum Hróksins á Grænlandi, og eiga félögin góða og nána samvinnu.

Allir geta orðið félagar í KALAK, tekið þátt í starfi félagsins og stutt einstök verkefni. Árgjöld í KALAK eru 5000 krónur, sem hægt er að skipta í tvær greiðslur.

Þá er einnig hægt að gerast LIÐSMAÐUR KALAK með því að greiða 1000 krónur, eða aðra upphæð að eigin vali, mánaðarlega.

KALAK heitir því að vinna af þrótti í þágu aukinna samskipta Íslands og Grænlands, með hagsmuni ungu kynslóðarinnar í fyrirrúmi, og gleði og vináttu að leiðarljósi.

Smellið hér ef þið vilið ganga til liðs við okkur og styðja mikilvæg og gefandi verkefni — og kynnast töfraheimi Grænlands.