KALAK – Vinafélag Grænlands og Íslands
Dagana 6.-20. september dvelja á höfuðborgarsvæðinu átján 11 ára börn frá afskekktum þorpum á austurströnd Grænlands og eru þau komin til að læra að synda og upplifa íslenskt samfélag.
Þetta er þrettánda árið sem KALAK og Hrókurinn standa að boði þessu með stuðningi Kópavogsbæjar, Menntmálaráðuneytis, FÍ og fjölmargra einstaklinga, félaga og fyrirtækja.
Tvisvar á dag fara þau í sund en jafnframt kynnast þau jafnöldrum sínum í skólum í Kópavogi þar sem þau sækja tíma. Að loknu sundnámi hvers dags er síðan hlaðin dagskrá þar sem þau fara í ferðir og kynnast ýmsu: bíó, leikhús, hestaferð, tívolí, Húsdýragarðurinn, Gullni hringurinn, Klifurhúsið, Rauði krossinn, Skautahöllin, heimsókn á Alþingi, fara á Bessastaði til forseta Íslands og margt fleira.
Þetta er því mikil og skemmtileg lífsreynsla en jafnframt lærdómsrík og vonandi gott fararnesti í framtíðina. Gleðin er því mikil hjá þessum ungu afkomendum okkar næstu nágranna.
Fyrsti hópurinn kom frá Scoresbysund í gegnum Akureyri.
