KALAK – Vinafélag Grænlands og Íslands
Inga Dóra Markussen ræddi málefni Grænlands
Húsfyllir var á súpufundi KALAK í Pakkhúsi Hróksins á laugardaginn, þar sem Inga Dóra Markussen, framkvæmdastjóri Vestnorræna ráðsins ræddi málefni Grænlands. Erindi Ingu Dóru var afar fróðlegt og vakti margar og áhugaverðar spurningar hjá gestum. Fundurinn markar upphaf að hátíðarhöldum vegna 25 ára afmælis KALAK, sem stofnað var 4. mars 1992.
Áður en fundur hófst var boðið upp á ljúffenga kjötsúpu sem Jón Grétar Magnússon töfraði fram, ásamt ilmandi brauði úr Bakarameistaranum, sem jafnframt lagði til gómsætar kökur með kaffinu.
Hrafn Jökulsson bauð gesti velkomna og sagði lítillega frá starfi KALAK og Hróksins á Grænlandi áður en hann kynnti Ingu Dóru til leiks. Inga Dora er sannkölluð dóttir Grænlands: Móðir hennar er Benedikte Abelsdóttir fv. ráðherra á Grænlandi og heiðursfélagi í KALAK, og Guðmundur Þorsteinsson forstöðumaður athvarfs fyrir heimilislausa og einstæðinga í Nuuk. Inga Dora var borgarfulltrúi og ritstjóri í Nuuk, en tók við starfi framkvæmdastjóra Vestnorræna ráðsins fyrir tveimur árum.
Inga Dóra byrjaði á því að sýna nýleg myndband sem gert var á vegum stjórnvalda í Nuuk, þar sem dregin er upp spennandi mynd af Grænlandi sem landi tækifæranna. Síðan rakti hún sögu lands og þjóðar, stöðuna nú og þær áskoranir og vandamál sem við er að glíma.
Erindi hennar var stórfróðlegt á köflum stórskemmtilegt, og vakti líflegar umræður fundargesta. Meðal þeirra sem vörpuðu fram spurningum eða lögðu orð í belg voru Kristjana Guðmundsdóttir Motzfeldt, Bryndís Haraldsdóttir alþingismaður og formaður Íslandsdeildar Vestnorræna ráðsins, Kristín S. Hjálmtýsdóttir framkvæmdastjóri Rauða krossins, Sveinn Rúnar Hauksson læknir Bogi Ágústsson fréttamaður og formaður Norræna félagsins.
