KALAK – Vinafélag Grænlands og Íslands
Á heimasíðu sveitafélagsins Sermersooq kemur fram að börnin í Ittoqqortoormiit eða Scoresbysundi hafi tekið sig til í sumar og safnað öl- og gosdósum sem hafa verið lýti á þessum fallega bæ lengi. Ákveðið var að borga 10 dkr. fyrir kílóið af dósum og gekk þetta ótrúlega vel. Börnin fengu væna vasapeninga og bærinn lítur svo miklu betur út á eftir. Þess má geta að í það minnsta á austurströnd Grænlands hefur ekki verið boðið upp á skilagjald á dósum sem má sjá á bæjunum.
Það eru um 50 dósir í kílóinu og í dag skiluðu börnin 139 kg af dósum sem eru um 7000 stykki. Það er þó langt í land því árlega berast drykkir í 300.000 dósum til Ittoqqortoormiit. En hver ferð hefst á hænuskrefi og Kalak er ánægt með framtakið. Bæjarbúar einnig og ekki síst krakkarnir sem krækja sér í svolítinn pening og nokkur tilkynntu það við afhendinguna í dag að þau væru sko ekki hætt!
