Ingibjörg Edda Birgisdóttir, fyrrum Íslandsmeistari kvenna, verður yfirkennari í ferðinni og verður stúlkunum mikil fyrirmynd því þó karlar hafi verið í meirihluta trúboðsins að undanförnu þá eru stelpurnar enginn eftirbátur þeirra við borðið og eru ótrúlega fljótar að tileinka sér skákina. Hrund Þórsdóttir, blaðamaður, mun gera ferðinni góð skil og rifjar nú upp trixin frá því í grunnskólakeppnunum. Tim Vollmer sem áður hefur verið hirðljósmyndari Hróksins, festir allt og alla sem fyrir verða á filmu en hann teflir nú á netinu sem óður og ætlar að sýna takta við skákborðið. Arnar Valgeirsson er leiðangursstjóri en hann hefur farið nokkrar ferðir með Hróksfólki og sá eini úr hópnum sem áður hefur komið svo langt norðureftir.
Miðvikudagskvöldið 30. mars voru leiðangursmenn með kynningu á verkefninu hjá Skákakademíu Reykjavíkur, í máli og myndum. Tóku þau svo öll þátt í móti þar sem ungt og efnilegt skákfólk tók þátt, ásamt reyndari mönnum. Geta ferðalangar þakkað fyrir að ekki verður mótspyrna yngri kynslóðarinnar jafn gríðarlega öflug eftir nokkra daga. Ferðir þessar hafa undanfarin misseri verið undirbúnar í góðu samstarfi við Kalak og hafa Grænlandsfarar Hróksins komið að ýmsum verkefnum varðandi komu “sundkrakkanna” á haustin.
Eymundsson, Actavis, Tele-post á Grænlandi og vonandi fleiri fyrirtæki sjá til þess að öll börn fá vinninga.ís-spor gefur bikara og verðlaunapeninga en fjárstyrkur fékkst frá Sermersooq sveitarfélaginu (sem nær frá Nuuk yfir á austurströndina) sem gerði það að verkum að hægt var að halda áfram þessu góða starfi. Ferðalangar munu blogga um ferðina á
http://godurgranni.blog.is/blog/godurgranni/